عندك منتوج هايل ؟ تصاور بروفيسيونال؟ والسومة معقولة؟… تهبط بوست ويجو مئات تعليقات: شحال السومة؟.. وانت تجاوبهم… ومبعد تتلقى ديراكت الصمت. وحتى واحد ما يرجع وما يريبوندي عليك !!
إذا صراتلك هاذي المشكل مش فيك..ومش في المنتوج تاعك…المشكل هو إنو راك تحاول تبيع لواحد ما فهمتيش نظام التشغيل (Operating System) اللي يخدم بيه عقلو…
المستهلك الجزايري مش صعيب بصح موسوس نتيجة سنين طويلة من التجارب المرة..من “الغش”، ومن انعدام الثقة…الشك عندو ماشي حالة نفسية !!هو آلية دفاع (Defense Mechanism)
ومهمتك الأولى فلحالة هذي مش انك تقنعو بالمنتوج بسيف عليه ..!! مهمتك هي تخترق جدار الشك هذاك..
ايجا نڨلك كيفاه :
لازم نديرو مع بعضانا تشريح عقلية الشك اللي هوما 3 أعمدة لازم تفهمهم :
1. إرث انعدام الثقة (The Legacy of Distrust):
السبب تاعو :
كبرنا في سوق وين الأصلي استثناء، وين الكلمة ما عندهاش قيمة، وكل واحد يخاف لا يطيحو بيه فلحفرة.. الإنترنت زادت الطين بلة مع يااسر صفحات تبيع الوهم في 2025 !!
النتيجة:
ال client الجزايري يدخل لأي صفحة وهو في وضعية المحقق يفترض بلي راح تخدعيه حتى تثبتلو انت العكس..! (وهذي حاجة فينا كامل كيما قلت )
2. الحاجة إلى الرابط الإنساني:
السبب:
مازلنا مجتمع يقدر الكلمة والمعرفة… البيع والشراء عندنا مبني على العلاقة الإنسانية بين البائع والشاري..هكا واضحة
النتيجة:
الclient يخاف من الشاشة الباردة… يحب يحس بلي كاين إنسان حقيقي وصادق مور لاباج هذيك ..يحب يهدر معاك مش غير يكوموندي وهكا يبني الثقة !
3. الخوف من الغلطة :
السبب:
الدينار تاعنا عندو قيمة في بلادنا ..وكل واحد يخاف يصرف دراهمو في حاجة ما تطلعش كيما كان يتوقع!!
النتيجة:
الclient يتردد ياسر قبل ما يشري… يسحق ضمانات وطمأنة مشي غير قبل البيع، حتى بعدو ثاني !!!
الأسلحة الاستراتيجية باش تخترق جدار الشك هذا :
1. الشفافية القصوى:
ما تبيعش المنتوج هكاك وبرا..وثّق الرحلة كاملة.. وري الكواليس، كيفاش تختار السلعة، كيفاش تغلفها… دير فيديوهات تشرح فيهم المنتوج بالتفصيل، بالمليح وبالخايب ثاني !!
الدليل الاجتماعي بطريقة المحكمة:
متحطش غير كابتيرات تع آراء الزبائن … جيب شهادات بالصوت والصورة.. دير لايفات مع الزبائن اللي شراو منك خليه الدليل يكون أقوى من أي شك !!
2. كون إنسان ماشي روبوت :
جاوب على الميساجات بفوكالات..بسك صوتك يبني ثقة ما تبنيها حتى كلمة مكتوبة… اسمع للزبون، حس بيه، حتى ولو ما شراش !! (تشناف مش مليح )
اظهر في الفيديوهات والستوريات تاعك.. الناس دير ثقة في الوجوه ماشي في اللوغوات ..تسما شخصيتك هي جزء من القيمة اللي راكي تبيع فيها !!
3. الضمان هو أقوى أداة تسويق:
حط سياسة إرجاع واستبدال واضحة وصارمة..وشهر بيها في كل بلاصة…
مثلاً: إذا ما عجبكش المنتوج، عندك مهلة (حط مهلة) باش ترجعو بشرط يرجع نظيف وجديد حاجة باينة هذي لانو كاين عباد مايحافظوش (بلاما نهدر زعما باينة)
خدمة ما بعد البيع:
احكي مع client بعد ما توصله السلعة.. سقسيه إذا عجباتو، إذا عندو مشكل. هاد الاهتمام الصغير هو اللي يحول زبون إلى سفير للماركة تاعك..
ما تشوفش هاد الصعوبة كعائق، شوفها فرصة استراتيجية…بسك المنافسين كامل راهم يركزو على البيع بش يدخل دراهم برك ، وأنت راح تركز ليوم على بناء الثقة على المدى الطويل، الثقة هي اللي تربح دايماً !!
السؤال تع ليوم:
واش هي الخطوة اللولة اللي تقدر ديرها اليوم في صفحتك باش تبدا تبني ثقة أعمق مع جمهورك مش غير تبيعلهم برك ؟
